Televiziyada “Ümid var” verilişi gedirdi. Kimi ağır illər xəstəsi idi, pulsuzluq ucundan müalicə ala bilmir, ümid var kanalı ilə xalqa müraciət edirdi ki, bəlkə ona bir yardım edən ola. Kimi yetim-yiyəsizdi, çıxıb ki, bəlkə yiyə çıxan ola, kimisi 3-4 uşaqla dul qalıb, ac-çılpaq uşağı saxlaya bilməyən ana, gəlib ki, bəlkə kömək əlini uzadan ola. Verilişin arasında da hər 5 dəqiqədən bir reklam verirlər ki, “Həccə getmək mövsümü başlayıb, gediş haqqı 3-4 min manatdır. Qeydiyyatdan keçməyə tələsin”.

Bu səhnəni görəndən sonra mən belə bir müraciəti yazmağı qərara aldım. Hər il 2-3 min zəvvar böyük məbləğdə pul töküb həccə gedirlər ki, o dünyaları üçün bir savab qazansınlar, etdikləri günahları töksünlər.
Savabların qazanılması, günahların tökülməsi üçün dində və şəriətdə olan bəzi dini kəlmələri müsəlman əhlinin yadına salım ki, savab qazanmaq üçün buradan uzaq həccə getməyə ehtiyac yoxdur. Elə evindən çıxmadan öz yurdunda sən bolluca savab qazana bilərsən. Səxavət göstərsən, həccdən umduğun savabı evində alarsan.
Quranda deyilir: “Mallarını gecə və gündüz, gizli və aşkar yoxsullara sərf edənlərin Rəbb yanında böyük mükafatı var” (2/274), yəni Rəbbin böyük savabı var.
Dini şəriətdə deyilir ki, “Möminin bir günlük zəlillərə, yoxsullara etdiyi səxavət 70 illik ibadətdən xeyirlidir. “Dul qadının yetimini doydurmaq, kimsəsizin, zəlilin hayına-dadına çatmaq, qocaların əlindən tutmaqdan alınan savab kəbə ziyarətindən üstündür.
Quranın 9/60 ayəsində deyilir: “Sədəqələr allah tərəfindən müəyyən edilmiş, bir fərz olaraq ancaq yoxsullara, miskinlərə, kölələrə, həmçinin borclulara məxsusdur”.
Yuxarıda deyilən dini tələbləri bir daha yada salaraq deyirəm ki, şükür ki, ölkəmizdə imkanlı şəxslər çoxdur. Onlar həcc üçün etdikləri xərci ölkəmizdə olan kimsəsizlər, zəlillər, yoxsullar üçün xərcləsinlər.
Həccə niyyət etməyən tüccarlarımız da kimsəsizlərin, xəstələrin, zəlillərin, yetimlərin əllərindən tutub onlara dayaq olsalar, allah qarşısında da, millət qarşısında da böyük ləyaqət göstərmiş olarlar.
Ey imkanlı dindarlar, öz sabahınız haqqında düşünün, sizin kəbəniz də, ibadətiniz də sizin səxavətinizdir, vicdanınızdır.