Amalsız ömürdən imtina.
Şərəfsiz ömürdən imtina.
Əzabsız sevincdən imtina.
Hünərsiz əməldən imtina.
Tonqallarda yandırılmaq sevinci.
Dabanından soyulmaq sevinci.
Sevincdən ayrılmaq sevinci.
Nəşədən ayrılmaq sevinci.
Müdhiş ağrılar sevinci.
Məhkum doğrular sevinci.
Qurbanlıq aqibəti. Mütləqə heyranlıq aqibəti.
Ruhani gözlər. Müqəddəs üzlər.
Haqqını tanımaq. Xalqını tanımaq.
Sadiqlik ülviyyəti. Xalislik ülviyyəti.
Cismin ruhda itməsi.
Gözün nurda itməsi.
Ölümü öldürənlər.
Əzabı sevdirənlər.
Özündənkeçənlər.
Alini seçənlər.
Fəlakətli fərəh. Müsibətli nəşə.
Faciə üstünlüyü. İşgəncə üstünlüyü.
Çətin həyat. Qədim həyat.
Alidə itən həyat.
Mütləqə yetən həyat.
Torpaq olub əkilmək.
Toxum olub səpilmək.
Ocaq olub qalanmaq.
Cismi ruha tapşıranlar.
Canı yola tapşıranlar.
Nisbini Mütləqə tapşıranlar.
Kiçiyi böyüyə tapşıranlar.
Həyatdan keçən həyatsevərlər.
Özündənkeçən bəşərsevərlər.
Nəşədən keçən nəşəsevərlər.
Şöhrətdən keçən ölümsüzlər.
Fəlakətli nikbinlər.
Məşəqqətli ilkinlər.
Kədərli bəxtəvərlər.
Zillətli məğrurlar.
Bəlalı uğurlar.
Qibtəyə layiq qibtəsizlik. Həsədə layiq həsədsizlik.
Gündəlik qəhrəmanlıq. Gündəlik cəngavərlik.
Mənanı təzahürdən üstün tutmaq.
Mahiyyəti əlamətdən üstün tutmaq.
Sonsuzu sonludan üstün tutmaq.
Ülvi “Mən”in cılız “Mən”i öldürməsi.
Ali “Mən”in quduz “Mən”i  öldürməsi.
Xalis “Mən”in naqis “Mən”i  öldürməsi.
Hissiyyatda heyvan ölümü.
Mənəviyyatda şeytan ölümü.
İradədə tərəddüd ölümü.
Vüqarda təşəxxüs ölümü.
Ülfətdə yalan ölümü.
Ürəkdə qorxu ölümü.
İnsanlıq imtahanı. Analıq imtahanı.
Atalıq imtahanı. Övladlıq imtahanı.
İnsanın mütləq mahiyyəti.
Vicdanın mütləq mahiyyəti.
Müqəddəs duyğu. Müqəddəs zəka.
Müqəddəs iradə. Müqəddəs yol.
Həqiqət atəşi. Sədaqət atəşi. Ruhani səadət atəşi.
Fədakarlığında Mütləqə çatırsan, İnsan!
Günahkarlığında ondan uzaqlaşırsan!