Çirkabla döyüş. Günahla döyüş.
Yalanla döyüş. Yamanla döyüş.
Köləliklə döyüş. Kölgəliklə döyüş.
Həqarətlə döyüş. Əsarətlə döyüş.
Bədbinliklə döyüş. Azğınlıqla döyüş.
Açıq çirkabla döyüş. Gizli çirkabla döyüş. Sirli çirkabla döyüş.
Çirkab cəzbiylə döyüş.
Qorxu zəhmiylə döyüş. Zalımlıqla döyüş.
Miskinliklə döyüş. Avamlıqla döyüş.
Duyğunu yamandan qorumaq.
Zəkanı yalandan qorumaq.
Əlləri haramdan qorumaq.
Xalisdəki naqisliyə nifrət.
Alidəki alçaqlığa nifrət.
Ülvidəki bəsitliyə nifrət.
Nisbi məhəbbətlə döyüş. Nisbi həqiqətlə döyüş.
Nisbi mərhəmətlə döyüş.
Nisbi ədalətlə döyüş. Nisbi qüdsiyyətlə döyüş.
Yarımfədakarla döyüş. Yarımcəfakarla döyüş.
Yarımqəhrəmanla döyüş.
Yarımvicdanla döyüş. Yarımümidlə döyüş.
Yarımsədaqətlə döyüş.
Daxildəki vəhşini öldürmək.
Daxildəki naşını öldürmək.
Daxildəki əsiri öldürmək.
Daxildəki hərisi öldürmək.
Daxildəki zalımı öldürmək.
Daxildəki məzlumu öldürmək.
Daxildəki inamsızı öldürmək.
Daxildəki qansızı öldürmək.
Daxildəki xülyanı öldürmək.
Daxildəki ölünü öldürmək.
Daxildəki səfili öldürmək.
Daxildəki əlili öldürmək.
Daxildəki əyyaşı öldürmək.
Daxildəki sərxoşu öldürmək.
Dünyanı yenidən görmək. Həyatı yenidən duymaq.
Təbiətlə yeni görüş. Ülviyyətlə yeni görüş.
Məhəbbətlə yeni görüş.
İşığın yeni mənası. Zülmətin yeni mənası.
Səadətin yeni mənası.
Məşəqqətin yeni mənası. Dodağın yeni kəlməsi.
Ürəyin yeni riqqəti.
Əllərin yeni hərarəti. Ayağın yeni yürüşü.
Ruhun bədənə sahib olması.
İradənin əmələ sahib olması.
Vicdanın mənəviyyata sahib olması.
Məhəbbətin hissiyyata sahib olması.
Ehtizazın zəkaya sahib olması.
Həqiqətin idraka sahib olması.
Yırtıcının ölümü. Hərcayinin ölümü.
Özünü tanımaq. Özünü anlamaq. Özünü öldürmək.
Özünü diriltmək.
Mütləqi nisbidən ayırmaq.
Xalisi naqisdən ayırmaq.
Cəsuru qorxaqdan ayırmaq.
Məğruru yaltaqdan ayırmaq.
Nöqsandan ayrılmaq. Əbədi ayılmaq.
Sevgini işrətdən ayırmaq.
Qüdrəti şöhrətdən ayırmaq.
Böyüyü cılızdan ayırmaq.
Məsumu cılızdan ayırmaq.
Doğrunu əyridən ayırmaq.
Qadınlaşan qadınlıq. Kişiləşən kişilik.
Gözəlləşən gözəllik.
Təmizləşən təmizlik. Vətənləşən vətən. Xalqlaşan xalq.
Saf heyranlıq.
Saf qurbanlıq.
Saf xəyal.
Saf Amal.
Saf fərəh.
Saf qələbə.
Saf and.
Saf inad.
Özüylədöyüşün – özün olmağındır, İnsan!
Hayıf ki, bunu unutmusan!