Mütləqsizlik. İnamsızlıq. Sabahsızlıq.
Köləliyə alışmaq. Kölgəliyə alışmaq.
Sürünmək aqibəti. Sürülmək aqibəti.
Əsarət fərəhi. Ətalət fərəhi.
Minüzlülük. Dargözlülük. İlqarsızlıq.
Satılmaq və yaşamaq. Satmaq və yaşamaq.
Aldanmaq və yaşamaq. Aldatmaq və yaşamaq.
Daşlaşmaq və yaşamaq. Otlaşmaq və yaşamaq.
Riyanı sevmək. Fitnəni sevmək.
Erkəkləşmə aqibəti. Dişiləşmə aqibəti.
Eyniləşmə aqibəti. Süniləşmə aqibəti.
Müqəddəsdən ayrılmaq. Ülvi səsdən ayrılmaq.
Gözəlliyə qıymaq. Körpəliyə qıymaq.
İlkinliyə qıymaq. Məsumluğa qıymaq.
Oyuncaq qüdrət. Oyuncaq səadət.
Zalım ədalət. Sadiq xəyanət. Zəngin səfalət.
Rəzalət cəzbi. Həqarət cəzbi. Çirkab cəzbi. Günah cəzbi.
Yalanla bəzənmək. Şeytana bənzəmək.
Satılmış təbəssüm. Satılmış məlahət. Satılmış əzəmət.
Satılmış heyranlıq. Satılmış həyanlıq.
Satılmış qurbanlıq. Satılmış pərəstiş.
Satılmış nəvaziş.
Qatil qətiyyəti. Yaltaq məlahəti. Xəsis səxavəti.
Özündən ayrılma fəlakəti. İblisə tapınma fəlakəti.
Qəhrəmanı sevməmək. Yaradanı sevməmək.
Təskinlik yuxusu. Həqiqət yuxusu.
Əyləncə qadınlıq. Oyuncaq kişilik.
Əllərin harama batması.
Dillərin doğrudan qaçması. Gözlərin qaranlıq saçması.
Bədən əsarəti. Boğaz qəbahəti.
Quduz işrət. Cılız istək. Heyvanlaşmaq. Yamanlaşmaq.
Yırtıcı duyğu. Yırtıcı arzu. Yırtıcı həmdəmlik.
Yırtıcı həyanlıq. Yırtıcı sürülük. Yırtıcı birlik.
Ağalıq ehtirası. Gədalıq ehtirası.
Vəhşi niyyət. Vəhşi əzəmət.
Yad doğmalıq. Yad sevdalıq. Yad ailə. Yad əməl.
Ürək süqutu. Dilək süqutu. Heyrət süqutu. Vəcd süqutu.
Ehtizaz süqutu. Nəvaziş süqutu. Pərəstiş süqutu.
Nikbin bədbinlik. Süni ilkinlik.
Gizlənən üzlər. Titrəyən dizlər.
Qatil sevinci. Rəzil sevinci. Paxıl sevinci.
Fateh sevinci. Əyyaş sevinci.
Müstəbid mərhəməti. Qorxaq cəsarəti.
Nəşə dilənmək. Mənsəb dilənmək. Rütbə dilənmək.
Hörmət dilənmək. Zora əyilmək.
Zalımsevənlər. Əzab verənlər.
Nahaq qanlıq. Qudurğanlıq.
Əzazil hakim. Zəlil alim. Ölü rəiyyət. Diri qəbahət.
Alçaqlığında İnsan kimi görünmürsən, İnsan!
İnsan bilinmirsən, İnsan!